A Sociedade Cultural Ledicia convoca concurso de carteis co gallo da celebración da XXXIX Feira do Bonito, que terá lugar os días 2 e 3 de agosto na zona portuaria de Burela.
A presidenta de Ledicia, Rocío Rivera Seara, explica que o colectivo “prepara varias actuacións para esta primavera e abre tamén o capítulo do verán, convocando o concurso de carteis para a XXXIX Feira do Bonito. Nesta ocasión adiantamos un pouco a convocatoria, coa intención de poder mellorar os prazos de traballo”.
Nas bases explícase: “convócase o concurso en dúas categorías, concursantes até 14 anos (incluídos) e concursantes maiores de 14 anos; poden participar tódalas persoas que o desexen, con un ou varios traballos que se entregarán sen asinar e acompañados dun sobre pechado cos seus datos no interior indicando no exterior a categoría na que concursan; o tema debe ter necesariamente relación co bonito e/ou co enxalzamento da Feira; o encabezamento do traballo será XXXIX FEIRA DO BONITO e deben aparecer tamén o lugar e data de celebración, Burela 2 e 3 de agosto de 2025; a técnica a empregar é libre, pero os traballos que se presenten en soporte informático deben acompañarse dun exemplar impreso”.
Tamén indican que “os orixinais poden entregarse ata o día 12 de maio local da Sociedade Cultural Ledicia, que está na Rúa do Ril, 4 entr/baixo, de Burela, de xeito persoal os luns entre as 20:30 e as 22:30 horas; por correo postal, no enderezo anteriormente sinalado; e se non fose posible acudir ao local, contactar con algunha persoa da xunta directiva. Premiarase un traballo por categoría: o gañador da Categoría A será para o programa de man; e o da Categoría B para o cartel anunciador da Feira. Os premios consistirán en obsequios representativos da Feira e serán entregados o propio dia da celebración; as persoas gañadoras serán convenientemente convocadas para o acto. Tódolos orixinais pasarán a ser propiedade da SCR Ledicia”.