Un ano máis Celeiro de Mariñaos xa ten todo listo para a Romaría do San Caetano e a XXVII Festa da Tortilla.
O sábado, 17 de agosto (Festa da Tortilla), comezará o festexo coa presentación das tortillas no campo da festa das 11:30 ás 13:30 horas. Despois, ás 13:30 horas misa na capela e procesión. A partir das 14:00 horas, sesión vermú co Cuarteto Tradicional Xarmolo e co grupo Toxo Guayaba, que presentará música cubana con alma galega. Ao ritmo da música desgustarase a tortilla. Ás 19:00 horas, Brais das Hortas actuará co espectáculo Consertasso na horta. Unha hora máis tarde, xogos tradicionais e ás 22:00 horas chegan as mellores versións da man de Dúo Bela e Charlo. A continuación, sesión DJ, baile do farolillo, entrega de premios e chocolatada.
O domingo, 18 de agosto, a gran sesión vermú dará comezo ás 13:30 horas e estará a cargo de Os Pandereteiros do Inferno, que chegan desde o Averno de Ribadeo cos sons tradicionais e as súas gorxas contundentes, e de Festicultores Troupe, cultivadores de festas. Haberá xamón cocido e cunca de caldo. Pola tarde, concurso máster tortilla ás 17:30 horas e entrega de premios para rematar a festa ás 18:00 horas.
A Irmandá de San Caetano conta coa colaboración da Deputación de Lugo, do Concello de Barreiros, Gadis e Cenor Bellanorte.