Buxiganga, o Proxecto Teatral Educativo da Área de Cultura da Deputación de Lugo continua medrando ano a ano. Nesta edición son un total de 40 grupos de teatro afeccionado con sede na provincia de Lugo os que participarán nas máis e 110 actuacións que hai xa programadas ao longo de todas as comarcas lucenses.
O Delegado de Cultura da Deputación de Lugo, Xosé Ferreiro, destacou que desde que o proxecto Buxiganga comezara a súa andaina no ano 2009, observouse que o número de colectivos teatrais na provincia vai en aumento. “Nestes anos pasouse dos 12 grupos iniciais aos 40 inscritos este ano, polo que podemos afirmar sen dúbidas que Buxiganga funciona como alicerce para a creación de tecido asociativo e base cultural na provincia de Lugo” precisou Ferreiro.
Desde a Área de Cultura destacan, así mesmo, o éxito a nivel de público que rexistra Buxiganga, acadando cifras de máis de 7000 espectadores e espectadoras repartidas por todas as comarcas lucenses.
A que é xa a oitaba edición de Buxiganga arrincou o sábado 23 de abril coas actuacións de dous dos grupos máis representativos do teatro afeccionado na provincia de Lugo: Os Baluros de Castro de Rei, que representaron no Corgo “Menciñeiro á forza”, da man da Asociación Cultural Arumes do Corgo, e o Grupo de Teatro do Hospital Xeral Calde de Lugo que representou na parroquia de Carballo, en Friol, a peza “Entre zánganos e flores”, a través da Asociación Cultural Carballo Vivo.
Ate mediados de novembro desenvolveranse ao longo de toda a provincia un total de 116 actuacións en 48 Concellos. As actuacións continúan esta fin de semana, o sábado 30 de abril en Begonte ás 17:30 horas co grupo lucense In Bocca al Lupo coa peza “Superlía”.