O mércores 12 de febreiro ás 11:00 horas o Auditorio Municipal Hernán Naval, de Ribadeo, será o escenario da obra No solo duelen los golpes, un monólogo autobiográfico da comunicadora e activista feminista Pamela Palenciano. Esta actividade, organizada polo CIM dentro do programa O Concello cos coles, está dirixida principalmente ao alumnado de 3º de ESO do IES Dionisio Gamallo e do Sagrado Corazón, así como a estudantes de Formación Profesional do CIFP Porta dá Auga.
No solo duelen los golpes é un monólogo unipersoal con pinceladas de autoficción que narra a vivencia persoal de Pamela Palenciano na súa primeira relación de noivado, que se tornou violenta ao longo de seis anos. A través da súa experiencia, a autora conéctanos coa historia universal das violencias machistas e a construción de estereotipos que xeran a desigualdade que permite exercer a violencia sobre outra persoa en todos os seus niveis. Utilizando humor acedo, ironía e unha interacción directa co público, Pamela logra xerar conciencia e provocar reflexións profundas sobre a violencia de xénero.
A concelleira de Igualdade en Ribadeo, Begoña Sanjurjo, explica que “aínda que a función está destinada principalmente aos centros educativos mencionados, reserváronse 30 prazas para mulleres que desexen asistir. As interesadas deben poñerse en contacto co CIM para xestionar a súa reserva no seguinte número de teléfono 982.120.739”.