O xerente da Fundación Expomar, José M. González 'Brais', aproveitou o marco da World Maritime Week, que se celebra en Bilbao del 19 al 21 de marzo, para manter diferentes reunións con empresas do sector e institucións relacionadas co mar.
A World Maritime Week é un encontro referente do sector marítimo internacional, que acolle en paralelo a celebración de catro congresos internacionais referentes aos sectores naval (Sinaval), pesqueiro (Eurofishing), portuario (Futureport) e de enerxías renovables mariñas (Marine Energy Week).
Ao igual que a Feira Expomar, o evento celébrase cada dous anos, polo que a Fundación Expomar aproveita a súa estancia en Sinaval para promocionar a próxima gran cita do sector pesqueiro e naval, que se celebrará no porto de Burela do 7 ao 10 de maio.
Expomar conta cun espazo propio neste certame, que xa visitaron, entre outros, Daniel Voces, director xerente da patronal europea da pesca, Europêche; ou Juan M. Trujillo, presidente da sección Pesca da Federación Europea de Traballadores do Transporte ETF e responsable de Pesca de CCOO; ambos habituais participantes nas Xornadas Técnicas de Expomar.
Asimesmo, desde Expomar tamén se mantiveron contactos con empresas expositoras como o Grupo Viscovo de Italia ou Sicor de Portugal, expositores de grúas mariñas ou aparellos de pesca; ao igual que con diferentes medios especializados do sector ou eventos como Navalia Vigo, outra das principais citas, xunto ás de Bilbao e Burela, para o sector marítimo e pesqueiro cada dous anos.
Segundo José M. González 'Brais', “os resultados desta estancia son altamente positivos, pois mantivemos diferentes reunións de traballo que nos serven case como punto de partida para a celebración nosa feira, xa que aquí atopámonos con moitos dos expositores que estarán en Expomar, e cos que nos citamos xa para dentro de sete semanas en Burela”.
A vixésima edición da feira monográfica náutico-pesqueira Expomar 2025 celebrarase do mércores 7 ao sábado 10 de maio no porto de Burela. Nas vindeiras semanas presentarase o programa completo de actividades desta 20ª edición, que volverá servir de excelente plataforma comercial para as principais firmas, fabricantes e administracións vinculadas ao sector pesqueiro.