Burela acollerá esta fin de semana dous obradoiros de radio e fotografía no marco do proxecto Burela Alumea. Estas actividades terán lugar o venres 11 ás 17:00 horas na Casa da Xuventude, e o segundo, o sábado 12 tamén ás 17 horas no local da asociación A Moncloa.
O Concello de Burela explica que “no obradoiro do venres as persoas participantes aprenderán a empregar os seus dispositivos co obxectivo de sacarlles o maior proveito posible. Tamén se lles ensinará a empregar equipamento profesional para obter imaxes e pezas de audio coas que retratar a cultura mariñeira de Burela. O taller do sábado, por outra banda, será de radio e foto participativa. Nel, dirixido tanto á rapazada como á xente do mar, aprenderase a xerar contidos que se plasmarán posteriormente no molde do faro recuperado polo Concello”.
As actividades serán totalmente gratuítas, pero será necesario apuntarse previamente nelas. Poderase facer as inscricións no número de teléfono 627.096.062.
O proxecto Burela Alumea conta co financiamento do GALP A Mariña-Ortegal, do FEMPA da Unión Europea e da Xunta de Galicia.