Máis de 180 veciños e veciñas de oito entidades da provincia de Lugo participan esta semana no programa da Deputación Coñece a túa provincia. Esta semana é a quenda da veciñanza de Lugo, Castro de Rei, Riotorto, Portomarín, Láncara e Alfoz, que coñecerá o patrimonio natural e cultural da provincia de Lugo a través de diferentes itinerarios.
Este martes as asociacións da capital lucense, Alume Saúde Mental e a de Amas de Casa y de Consumidores, viaxarán ata á comarca da Mariña Lucense. Os primeiros emprenderon desde a Granxa Gayoso Castro a súa viaxe para percorrer a pé un tramo do paseo marítimo de Barreiros, visitar a praia das Catedrais e logo desprazarse a Rinlo. Pola súa contra, o colectivo de Amas de Casa visitou o casco antigo de Mondoñedo e o cemiterio vello na localidade.
Mañá mércores será a quenda da asociación de veciños Santa Eulalia de Esperante, de Lugo, que visitarán Monforte de Lemos. Farán parada no Museo do Ferrocarril, e logo coñecerán o conxunto monumental de San Vicente do Pino, e o Centro do Viño da Ribeira Sacra. Nesta xornada tamén a asociación de Mulleres Rurais A Xuntanza, de Castro de Rei, visitarán a Ribeira Sacra. Desprazaranse ata O Saviñao para coñecer o Ecomuseo de Arxeriz, o miradoiro do Cabo do Mundo e logo facer a ruta fluvial en catamarán polo Miño.
O xoves é a quenda da asociación Coro Parroquial, de Riotorto, que coñecerán o Pazo de San Marcos e continuarán a súa viaxe cara Monforte de Lemos, onde visitarán o Museo do Ferrocarril, o conxunto monumental de San Vivente do Pino, e o Centro do Viño da Ribeira Sacra.
Para rematar a semana, o venres a asociación Veciñal e Cultural Santiago de Cedrón, de Láncara, partirán do Mazo de Santa Comba para achegarse ata o concello de Cervo. Tamén este mesmo día, a Asociación de Veciños de Bacoy, de Alfoz, descubrirá as instalacións da Granxa Gayoso Castro, de titularidade provincial, e realizará a ruta de Monforte de Lemos, que inclúe unha viaxe en catamarán polos Canóns do Sil.
A iniciativa provincial está dirixida a asociacións e colectivos sen ánimo de lucro de toda a provincia e consiste en viaxes gratuítas, en pequenos grupos, dunha xornada de duración por diferentes puntos da xeografía lucense seguindo diversas rutas polo patrimonio natural, histórico, cultural e gastronómico.
O programa Coñece a túa Provincia inclúe, de balde, o transporte para os traslados de ida e volta dende o lugar ou lugares de orixe, póliza de seguros de viaxeiros, menú de xantar, e entradas e visitas a diferentes lugares de interese da provincia de Lugo. Estas visitas realízanas profesionais que contan coa habilitación de guía oficial de turismo de Galicia e persoal de atención ao público nos diferentes museos, empresas ou obradoiros sinalados nos itinerarios do programa.